Rain Update : नगरकरांनो सावधान! 19 ते 23 सप्टेंबर दरम्यान मुसळधार पाऊस, ‘यलो अलर्ट’ जारी

भारतीय हवामान खात्याच्या अंदाजानुसार 19 ते 23 सप्टेंबर दरम्यान अहिल्यानगर जिल्ह्यात विजांचा कडकडाट, जोरदार वारे आणि मुसळधार पावसाची शक्यता.

Ahilyanagar Rain Update Yellow Alert : भारतीय हवामान खात्याने दिलेल्या अंदाजानुसार दिनांक 19, 23 सप्टेंबर 2025 रोजी अहिल्यानगर जिल्ह्यात विजांचा कडकडाट, जोरदार वारे आणि मुसळधार पावसाची शक्यता वर्तविण्यात आली आहे. या पार्श्वभूमीवर जिल्हा प्रशासनाने अहिल्यानगर जिल्ह्यासाठी ‘यलो अलर्ट’ जारी करून नागरिकांना सतर्कतेचा इशारा दिला आहे.

नद्यांच्या विसर्गात वाढ; पूरस्थितीचा धोका

पुणे, नाशिक व अहिल्यानगर जिल्ह्यातील धरणांमधून पाण्याचा (Rain Update) विसर्ग वाढला आहे. त्यामुळे जिल्ह्यातून वाहणाऱ्या नद्यांच्या पाणीपातळीत वाढ होत आहे. नदीकाठच्या नागरिकांनी सतर्क (Ahilyanagar) राहावे, असे आवाहन जिल्हा आपत्ती व्यवस्थापन प्राधिकरणाकडून करण्यात आले आहे.

सध्या भिमा नदीवर दौंड पूल येथे 12, 350 क्युसेक, गोदावरी नदीवरील नांदूर मध्यमेश्वर धरणातून 4769 क्युसेक, प्रवरा नदीवरील निळवंडे धरणातून 700 क्युसेक, ओझर बंधारा 1,115 क्युसेक, मुळा धरणातून 10,000 क्युसेक, घोड धरणातून 7000 क्युसेक, सीना धरणातून 1,628 क्युसेक, कुकडी नदीवरील येडगांव धरणातून 750 क्युसेक, हंगा नदीवरील विसापूर धरणातून 350 क्युसेक इतका विसर्ग सुरू आहे.

प्रशासनाकडून नागरिकांना सूचना

– मेघगर्जना होत असताना झाडाखाली, टॉवर, ध्वजांचे खांब किंवा धोकादायक ठिकाणी उभे राहू नये. विद्युत उपकरणांचा वापर टाळावा.
– नदी, ओढे व नाल्याकाठच्या नागरिकांनी पाणीपातळी वाढल्यास सुरक्षित ठिकाणी स्थलांतर करावे. पाण्याने भरलेले पूल ओलांडू नयेत.
– मोकळ्या जागी असल्यास गुडघ्यावर बसून डोके झाकून घ्यावे.
– जनावरांचे स्थलांतर सुरक्षित ठिकाणी करावे व शेतीमालाचे नुकसान टाळण्यासाठी नियोजन करावे.
– पर्यटनासाठी धरणे, नद्या व धबधब्यांच्या परिसरात जाणे टाळावे. धरणांच्या पाणलोट क्षेत्रांमध्ये पाण्याच्या प्रवाहाजवळ जाण्याचे टाळावे.
– आपत्कालीन परिस्थितीत स्थानिक पोलीस स्टेशन, तहसील कार्यालय किंवा जिल्हा नियंत्रण कक्षाशी संपर्क साधावा.

जिल्हा नियंत्रण कक्षाचा टोल-फ्री क्रमांक 1077 असून दूरध्वनी क्रमांक 0241-2323844 आणि 2356940 उपलब्ध आहेत, असे आवाहनही करण्यात आले आहे.

संबंधित बातम्या